انور السادات

محمد انور السادات تالت رئيس لجمهورية مصر و حكمها من 1970 لحد اغتياله فى 6 اكتوبر سنة 1981.اتولد السادات فى 25 ديسمبر 1918 فى قرية ميت ابو الكوم فى محافظة المنوفيه .اتجوز "جيهان صفوت" سنة 1949 بعد ما انفصل عن مراته "اقبال ماضى" اللي إتجوزها سنة 1940. وله 3 بنات من "جيهان" , اللى اشتهرت بجيهان السادات.اشتهر السادات بقوته وبصراحته وبذكاءهُ و حكمتهُ وحبه لمصر و قدر يطلعها من دايرة الحروب والدمار للتنميه و الانفتاح و رجع اسمها التاريخى العريق اللى اتنازل عنه جمال عبد الناصر اللى حكم قبله لأول مره فى تاريخها. أخد جايزة نوبل للسلام.

دخل المدرسه الحربيه 1935 .
اتخرج منها كملازم تاني 1938.
شارك فى انقلاب الظباط الاحرار 1952.
بقى رئيس مصر سنة 1970.
شن حرب اكتوبر 73 على اسرائيل.
وقع اتفاقية سلام مع اسرائيل.
اخد جايزة نوبل للسلام (1978)
اغتاله تنظيم الجهاد على ايد خالد الاسلامبولى سنة 1981 .
حرب 1973

من أهم الحاجات التى عملها السادات إنه حارب اسرائيل فى حرب 6 اكتوبر سنة 1973. فى ظرف ست سنين بس قدر يعيد بنا جيش مصر اللى اتدمر فى حرب 1967 و يخوض بيه حرب و يخرج منتصر .

سلام

السادات إتفاوض على السلام من موضع قوه و عمل اتفاقية السلام المصريه الاسرائيليه سنة 1978 و رجع بقية سينا من غير ما مصرى يتقتل فى حرب تانيه ، برؤيتهُ للمستقبل العالمى وتوقعاته بإنهيار السوفييت.

السادات اخد جايزة نوبل فى السلام سنة 1978 بسبب مجهوده و إهتمامه بـ السلام بالإشتراك مع مناحيم بيجن .

المعارضة للسادات

الشيوعيين بيلوموه على سياساته الراسماليه ومحاولته انه يلغى الدعم.
الليبراليين بيلوموه على انه سمح للجماعات الاسلاميه والمتطرفيين إنهم يدخلو العمل السياسى عشان يوازنهم مع الشيوعيين. بعد كده جماعه من الجماعات التابعه لتنظيم اسلامى خططت ل اغتياله . وبعدين بقوا قوه بعد كده لحد ما تصدى لهم الأمن فى التسعنيات بيلوموه كمان انه قبض على عدد كبير من المثقفيين و من كل التيارات السياسية و الدينية وكل اللى كانوا بيعارضوه وقفل كل الجرايد اللى مش قومية وسجنهم فى 5 سبتمبر 1981 .
العرب بيلوموه على معاهدة السلام ، و بقيادة أحمد حسن البكر اللى كان رئيس العراق وقتها خرجوا مصر من الجامعه العربيه و كونوا حاجه اتسمت جبهة الصمود و التصدى انتهت للاشىء و ما حققتش أى حاجه و انتهت العراق نفسها بتدميرها و البلاد اللى شاركتها بتعانى صعوبات مصيريه فى شرق اوسط بيتغير شكل خريطته ، مع إن السادات كان بيقترح حل نهائى للفلسطينيين بإنسحاب اسراائيل لحدود 1967.
مهما كانت الانتقادات قدر السادات يوقف نزيف الدم و وفر الاف القتلى و المعاقين اللى كانو ممكن يكونو ضحايا لحروب بين مصر و اسرائيل.

تكريم و ميدان أنور السادات

اتكرم السادات فى كل بلاد العالم المتحضره و نال احترام الشعوب المحبه للسلام و أخد جايزة نوبل للسلام. فى 22 ديسمبر 2009 اسرائيل كرمته فسمت ميدان فى مدينة حيفا على اسمه.

مؤلفاته

السادت ألـّف كتاب عن حياته اسمه البحث عن الذات.
يا ولدى هذا عمك جمال
ثورة على النيل
القصة الكاملة للثورة.
الصفحات المجهوله للثوره.